Кореографија: Саша Евтимова
Музика: избор
Костим: Саша Евтимова
Изведувачи: Нина Петрушевска, Михаела Колцункова, Наѓа Луканова, Теона Ѓуровска, Миа Петровиќ, Ивона Манасијевска, Елена Терзиева, Марија Андонова, Мила Ангелова
Ко-продукција: НОБ / Скопје танцов театар / 2026

Делото произлегува од потребата на кореографката да го истражи моментот кога работите речиси функционираат — но никогаш целосно. Танчерите се обидуваат да воспостават ред, да се синхронизираат, да пронајдат логика. Но секогаш нешто им излегува од контрола.

Токму во тој обид се појавува апсурдот — не како хаос, туку како состојба во која сè е „речиси“ на своето место. Преку движење, текст и хумор, се отвора простор каде несовршеноста станува искрена, а недоразбирањето — човечко.
Можеби и не е важно дали сè има смисла.
Доволно е што се обидуваме.

Кореографија: Адријана Данчевска Ровчанин
Музика: Александар Гроздановски
Изведувачи: Тереза Лазарев, Нина Петрушевска
Костим: Скопје танцов театар
Продукција: Скопје танцов театар / Интерарт Културен Центар, 2025

„Ремикс 0.2“ ја истражува комплексната релација помеѓу женското тело и општествените улоги што му се наметнуваат – негувателка, заводничка, борец, ранлива фигура. Делото ги третира овие улоги како слоеви што постојано се менуваат, како костими што телото ги носи и ги оттурнува.

Преку физички интензивен и сензуален сценски јазик, претставата ја открива тензијата помеѓу личниот идентитет и општествените проекции. Телото станува поле на трансформација – истовремено силно и ранливо, отпорно и изложено.

Движењето функционира како реакција на невидливите притисоци што го обликуваат женското постоење, отворајќи простор за прашања за слободата, контролата и вистинскиот идентитет.